Goodies

Lia Bia Bouquet 

C'èst dmwin li djoû di m' mâriâdje,
Aprèstez, aprèstez tos vos bouquèts
Vos lès mètroz au cwârsâdje
Dès bauchèles di vosse banquèt.
Mins c'èst l'mène li pus djolîye
Ossi vraîmint dji m' rafîye
Di lî doner li bouquèt
Èlle aurait li - i bia bouquèt !

Ç'a stî one saqwè d' drole,
L'ôte fîye, dj'aveûve one crole,
Tot-aspouyî
Dj'alè sokî,
L'amoûr m'a rèwèyî.

C'èsteûve mi p'tite Marîye ;
Come èle èsteûve djolîye !
Quén' embaras
Ç'a stî ç' djoû-là
Qui dj'a signé l' contrat!

Adiè totes mès folîyes,
Dj'intère dins l' confrérîye,
C'è-st-à l'auté
Qui dj' va djurer
Amoûr, fidélité.

C'èst d'mwin qu' dji m' boute à pièce
Adiè tote li djon.nèsse
Po comincî,
Dji m' va satchî
À l' cwade à tot spiyî.

Li Tchant des Walons

 I.
Nos estans firs di nosse pitite patreye
Ca lådje et long, on djåze di ses efants.
Å prumî rang on l' mete po l' industreye
Et dvins les årts ele riglatixh ostant.
Nosse tere est ptite, mins nos avans l' ritchesse
Des omes sincieus k' anoblixhèt leu nom.
Et nos avans des libertés timpesse:
Vola pocwè k' on-z est fir d' esse Walon !

II.
Di nosse passé cwand c' est k' on let l' istwere,
On s' recresteye vormint a tchaeke foyou.
Et nosse cour crexhe cwand c' est k' on tuze al glwere
Di nos vîs péres ki n' avît måy pawou.
C' est gråce a zels ki ns djouwixhans del påye.
Il ont språtchî l' innmi dzos leu talon.
On ls a rclamé les pus vayants k' i gn åye:
Vola pocwè k' on-z est fir d' esse Walon !

III.
Pitit payis, vos k' a tant d' grandeu d' åme,
Nos vos inmans bén, sins k' nos l' breyanxhe tot hôt.
Cwand on vs kidjåze, ås ouys montèt nos låmes
Et nos sintans nosse cour bate a gros côps !
N' åyîz nole sogne et vikez e liyesse,
Di vos efants, les bresses et l' cour sont bons.
Et nos avans les tchveas foirt près del tiesse:
Vola pocwè k' on-z est fir d' esse Walon !

IV.
On s' voet voltî inte frés del Walonreye
Et on-z est presse onk l' ôte a s' diner l' mwin.
On fwait plaijhi bén sovint sins k' on l' deye.
Nouk ni s' håyneye cwand c' est k' i vout fé l' bén.
Li tchårité ki mousse el måjhinete
N' î va k' al nute avou meye precôcions.
Li pô k' on dene on nel dene k' e catchete:
Vola pocwè k' on-z est fir d' esse Walon !