Li vile di Nameur a stî spotéye “ li glote ” (qui mougne voltî bon). Tos l’s-ans, dispû lès-anéyes cinquante, on-z-adjancenéye, timps dès Fièsses, one place di bons Gouts èt d’ boune Qualité !Ça faît qu’ tot l’ monde pout trover èt goster véla lès miscoterîyes d’èmon nos-ôtes, èt gn-a brâmint. 

Mins po ça, il a falu qui l’ Comité central èt l’ Confrérîye dès botchîs èt dès crauchîs boutinche èchone. 

Au c’mincemint, on-z-aveûve tchwèsi li Place do Martchi dès djotes. Come di jusse pwisqui c’èsteûve li keûr dès Fièsses. One vintin.ne d’anéyes pus taurd, come on-z-î fieûve di trop l’ fièsse po vraîmint fé r’ssôrti l’qualité dès prodwîts namurwès, on-z-a bagué à l’ Place l’Îlon po aurder l’ lècsion. Pwis on-z-a stî à l’Atènéye di Nameur, todi po waîtî do tinre li boune qualité.

Come on ’nn’a l’abitude èt come on l’a todi faît, li place èst douviète po tortos èt po lès familes... On-z-î cûjenéye come dins l’ timps…

Su l’ cârte, djote, avisances, dispouye èt co dès-ôtès-afaîres qui f’ront glèter lès djon.nes èt lès vîs…

On-z-a adjancené one ôte place po lès p’tits fé l’ fièsse ossi.

One place à discouviè ou à r’discouviè po goster, choûter, riwaîtî, rèscontrer èt s’ bin plaîre…