Lès Fièsses di Walonîye ont todi v’lu çoci, avou deûs trwès-ôtès-afaîres : mète li langue walone au mitan do djeu. D’abôrd, i n’ si faut nin èwarer si l’idéye d’one mèsse è walon a djaurné avou l’s-anéyes. Portant si nos-î èstans faîts au djoû d’audjoûrdu, ci n’èsteûve nin gangnî d’avance di ç’ timps la. I faut sawè qui po l’s-ofices, on s’ sièrveûve todi do latin èt, sondjî qu’il aleûve lèyî l’ place – ni sèreut-ç’ qu’on côp tos l’s-ans – à one ôte langue, c’èsteûve quausu one wadjûre.

Po fini, c’è-st-è 1952 qu’ l’afaîre si passerè, one afaîre qui compte co todi ostant audjoûrdu, c’è-st-à dîre qu’on n’ saureut fé sins. Grâce à Monsègneur Charue, deûs cantiques è walon scrîts pa Joseph Calozet èt l’ R.P. Guillaume sont tchantés pa l’ corâle Lès XXII qu’Ernest Montellier mwin.ne. Li min.me Ernest Montellier èt Lucien Léonard ont ètèrpris on-ovradje di nûton : ratoûrner one drigléye di tècses sacrés do francès viè l’ walon. Faleûve co trover on curé à s’-t-auje assez avou l’ walon po fé tot s’ prétchemint dins ç’ langue la. Ç’a stî l’ cas avou l’abé Jacoby. Adonpwis, i passerè l’ mwin à l’abé Malherbe, todi maîsse do djeu audjoûrdu.

D’one deure wadjûre qu’il èsteut, l’ofice a div’nu avou l’ timps one saqwè à n’ nin manquer, min.me por one gade d’ôr. On n’ saureut pus tûzer audjoûrdu on londi dès Fièsses di Walonîye sins pont d’ mèsse è walon. Lès djins vègnenut à brâmint èt sont prèsses à tot sacrifyî po-z-awè one bèle place è l’èglîje Sint-Djan. I faut dîre qui l’endrwèt vint r’mète one paletéye di simbole. Li Place do Martchi dès djotes èst bôkîye d’istwêres èt adon èle dit brâmint su l’ sôcièté èt ç’ qui s’ passe inte lès sôtes di djins.

On prîye avou s’ keûr, d’ostant d’ pus qu’i-gn-a lès camèras. Li mèsse passe dirècteumint su l’ TV comunautaîre èt lès gazètîs d’ Nameur èt d’avaurla sont-st-à l’awaîte : d’abôrd il î faut yèsse vèyu. Lès djins publiques ni s’ polenut nin pèrmète di n’ nin v’nu. Dijans l’ platèzak : on s’arindje sovint po ièsse dins l’ouy dè l’ camèra.

Po clôre li cayèt, on pout dîre qu’au c’mincemint, il a falu brâmint wasu èt risquer po-z-èmantchî ç’-t-ofice la. Asteûre li mèsse è walon a div’nu one dès maîssès-pîces dès Fièsses di Walonîye, èt çola à cause dès djins qu’î mètenut tot leû keûr.