Li fwârt conûwe bataye dès Chacheûs. Li mot « Échasseur » di nosse francès d’ Nameur vint foû do mot walon « Chacheû », po lomer l’ ci qui s’ bat su dès chaches. 

Ci sôte di bataye la èst l’ pus drole dès-ûsances do folklore di Nameur èt ossi one dès pus vîyes. On l’ vwèt su one ôrdonance comunâle di 1411. Come d’èfèt, on s’ bateûve dèdja fwârt voltî su dès chaches è nosse vile di ç’ timps la.

Paurtis à deûs bindes, lès Mélans èt lès-Avrèsses, lès lûteûs sayenut d’ fé tchaîr lès cias d’ l’ôte costé di saquants difèrin.nès maniéres : boutadje avou li spale, disfinse avou l’ keûde, côps d’ pougn è stoumac΄, caladje dè l’ chache, asglignadje, èt brâmint d’s-ôtes.

Dins l’ vî timps, gn-aveûve deûs sôtes di batayes : lès cines qui lès-èchèvins ofrichin.n΄ à môde di spèctake aus maîsses qui passin.n΄ à Nameur èt l’ bataye jènèrâle qui rachoneûve one grande pârtîye dès djins. Audjoûrdu, lès deûs soces di Chacheûs, montés su dès chaches fine parèyes aus chaches di leûs tayons, si batenut à saquants-ocâsions, ossi bin à Nameur qui foû do payis. I s’ mostêrenut à brâmint dès manifèstâcions intèrnacionâles folkloriques.

Li bataye dè l’ chache d’ôr, c’èst l’ côp qui bouche po tos lès Chacheûs. Èlle è-st-adjancenéye li trwèsyin.me dîmègne di sètimbe po lès Fièsses di Walonîye, dès Fièsses qui faîyenut viker tos l’s-ans lès rûwes dè l’ vile do bia Bouquèt.