È 1928, on-z-èmantche dès batayes di scrîjeûs qui l’ prumî r’cît one Gayârde d’ârdjint. Pwis l’ûsadje divint pus laudje ca on vout rinde bon d’vwêr à dès Walons qu’ont mostré, pa leû sawè fé ou leûs-ovradjes, qu’i mèritin.n΄ li r’conichance dè l’ Walonîye. À l’ difin, n’impôrte quéne djin qui boute po bin fé, èwou qui ç’ fuche, a one chance do yèsse nominéye èt mètûwe à l’oneûr. 

Ossi rade qui ça a c’mincî, c’èst l’ Consèy d’ An’ministrâcion do Comité Central di Walonîye qu’a yeû li drwèt do tchwèsi li djin d’ l’anéye. On-ovradje di copiche di d’abôrd on-an. I faut sayî d’ yèsse li pus jusse possibe èt veûy quî ç’ qui convint l’ mia po ç’ qu’on d’mande, c’è-st-à dîre yèsse loyî à Nameur èt s’awè bin faît conèche dès djins. 

Li Gayârde è-st-à paurt do rèsse ; c’è-st-one saqwè d’ sérieûs au mitan d’one fièsse populaîre. Au c’mincemint, on r’mèt l’ Gayârde è Tèyâte, one place qui n’èst nin come one ôte. Maugré tot, on n’ rovîye nin lès djins d’ Nameur. Tot l’ monde pout v’nu èt on-z-intêre po rin. 

Asteûre, vola saquants-anéyes qui li r’mètadje si passe è l’ Maujone dè l’ Culture. Lès djins sont télemint arèdjîs après ç’ fièsse la qu’on n’ saureut pus sondjî dès Fièsses di Walonîye sins pont d’ Gayârde. Si c’è-st-insi, c’è-st-ossi à cause dès médias. Tot l’ monde cârcule quî ç’ qui sèrè tchwèsi ; on-z-è d’vise tos costés. C’è-st-one grande chîje populaîre qui l’ TV comunautaîre vint co rèfwarcî..