E 1913, on a ètindu causer dès Fièsses di Walonîye avou one pîce di tèyâte è walon. E 1919 èt 1920, on a rindu omadje aus combatants dè l’grande guêre. E 1922 Françwès BOVESSE, Prince dès Chwès èt djon.ne dèputé, rachone autoû d’li saquants bons soçons po mète su pîd li «Comité Central di Walonîye». Nosse patrimwin.ne walon : tchansons, concours di rècitâcions walones, tèyâte è walon èt li côrtèje folklorique avou lès chacheûs èt lès aurdjouwants (1), èst r’mètu à l’oneûr.

Li «Comité Central di Walonîye» vout waurder èt dèv’loper lès sintimints walons, disfinde lès drwèts dès Walons èt ôrganiser one fièsse po s’sov’nu dès djoûrnéyes di sètimbe 1830. È 2008, nos v’lans yèsse lès gardyins di nos vîyès-ûsances èt di l’èsprit walon po rimète li mèssadje à nos èfants èt à nos p’tits èfants. Nos Fièsses di Walonîye div’nut yèsse lès fièsses di tot l’monde come li v’leûve Françwès BOVESSE.

C’èst bin po ça qu’on î trove lès Lèvers dès drapia walon, li vôye dès plaques, li Martchi do bia Bouquèt, lès Waloniâdes, li Mèsse è walon, l’Omadje à Françwès BOVESSE, li Pèlèrinadje au cim’tiére di Belgrade, li R’mîje dè l’Gayârde, li Folklore èt Nameur li glote. (1) : les échasseurs et les géants.