Tote l’équipe do Comité central di Walonîye vos prîye, ètur li sèmedi 11 èt l’ londi 20 di sètimbe, po lès fièsses di 2010, avou co todi brâmint dès bèlès-afaîres. 

À costé di ç’ qui s’ passe tos l’s-ans, i-gn-aurè dès afaîres spéciâlemint po ç’te anéye ci. 

2010, on mètrè à l’oneûr li Réjion Walone qui fièstéye sès 30 ans. Adon, gn-aurè dins lès reuwes di Nameur, one grande convôye di djins qui r’présinteront totes lès cwanes di nosse chére Walonîye.

Li tinme namurwès di 2010, ci sèrè lès 20 ans dès Waloniâdes. Ça faît qu’i-gn-aurè co d’ pus d’èquipes èt d’ pus di mwins’ djon.nes. Po-z-aspoyî su ç’ tinme la, nosse soçon André Dubuisson mostur’rè sès fotos su l’ Place d’Armes, èmon Nameur li Glote, tot l’ timps dès fièsses. 

Po l’ 4yinme côp d’ rote, nos-èmantcherans po l’s-èfants on grand “pique-nique” èt on spèctake li vinrdi d’ l’après-l’dîner, su l’ Place d’Armes. C’è-st-insi qui l’istwêre dès Fièsses di Walonîye sèrè contéye aus tchots d’ 5yinme èt d’ 6yinme primaîre di noûf sicoles do grand Nameur. 

Come vos l’ p’loz veûy, i-gn-aurè co po tos lès gouts. C’èst po ça qu’ nos v’ sowaîtans d’dja à tortotes èt à tortos, dès fwârt bèlès Fièsses di Walonîye.